Delhi Car Blast: ಚಲಿಸುತ್ತಿದ್ದ ಭೀಕರ ಕಾರು ಸ್ಪೋಟಕ್ಕೆ 9 ಜನರ ಸಾವು|ಉಗ್ರರ ದುಷ್ಟ್ರತ್ಯದ ಜಾಡು ಸಿಸಿಟಿವಿಯಲ್ಲಿ ಪತ್ತೆ! 2900 ಕೆಜಿ ಸ್ಪೋಟಕಗಳ ಪತ್ತೆ
ಕ್ಷಣಾರ್ಧದಲ್ಲಿ ಮೃತದೇಹಗಳು ಛಿದ್ರಗೊಂಡು ರಸ್ತೆಯಲ್ಲಿ ಚೆಲ್ಲಾಪಿಲ್ಲಿಯಾಗಿ ಬಿದ್ದ ದೃಶ್ಯ ಕಂಡು ಬಂದಿದೆ. ಬೆಂಕಿಯ ಜ್ವಾಲೆ ಸುತ್ತಮುತ್ತಲೂ ನಿಂತಿದ್ದ ಕಾರುಗಳಿಗೆ ಹಾಗೂ ಬೈಕ್‌ಗಳಿಗೆ ಹರಡಿ, ಅವುಗಳು ಕರಕಲಾಗಿವೆ.
ದೆಹಲಿಯಲ್ಲಿ ಸೋಮವಾರದಂದು ಸಂಜೆ ನಡೆದ ಭೀಕರ ಕಾರು ಸ್ಪೋಟದಲ್ಲಿ ಒಂಬತ್ತು ಜನರ ಸಾವಿಗೆ ಕಾರಣವಾದ ಬಿಳಿ ಬಣ್ಣದ ಹುಂಡೈ i20 ಕಾರಿನ ಮೊದಲ ದೃಶ್ಯಗಳು ಬೆಳಕಿಗೆ ಬಂದಿವೆ.
ಇದು ಸ್ಫೋಟಕ್ಕೆ ಕೆಲವೇ ನಿಮಿಷಗಳ ಮೊದಲು ಕೆಂಪು ಕೋಟೆಯ ಪಾರ್ಕಿಂಗ್ ಸ್ಥಳದಲ್ಲಿ ತೆಗೆದ ಸಿಸಿಟಿವಿ ದೃಶ್ಯಾವಳಿಯಾಗಿದೆ ಎಂದು ಹೇಳಲಾಗಿದೆ.
1.30 ನಿಮಿಷಗಳ ವೀಡಿಯೊದಲ್ಲಿ HR 26CE7674 ನೋಂದಣಿ ಸಂಖ್ಯೆಯನ್ನು ಹೊಂದಿರುವ ಕಾರು ಟೋಲ್ ಬೂತ್ ತಲುಪಲು ಸರದಿಯಲ್ಲಿ ಕಾಯುತ್ತಿರುವುದನ್ನು ತೋರಿಸುತ್ತದೆ.
ನಂತರ ಬಿಳಿ ಬಣ್ಣದ ಕಾರು ಆ ಸ್ಥಳವನ್ನು ತಲುಪುತ್ತದೆ ಮತ್ತು ಚಾಲಕನು ಅಲ್ಲಿನ ಪಾರ್ಕಿಂಗ್ ಸಿಬ್ಬಂದಿಯಿಂದ ಚೀಟಿಯಂತೆ ಕಾಣುವದನ್ನು ತೆಗೆದುಕೊಳ್ಳಲು ತನ್ನ ಕೈಯನ್ನು ಚಾಚುತ್ತಾನೆ. ಕ್ಲಿಪ್ ನವೆಂಬರ್ 10 ರಂದು ಸಂಜೆ 6.22 ದೆಂದು ತೋರಿಸುತ್ತದೆ.
ಚಾಲಕನ ಸೀಟಿನಲ್ಲಿರುವ ವ್ಯಕ್ತಿ ಕ್ಲಿಪ್‌ನಾದ್ಯಂತ ಸಂಪೂರ್ಣವಾಗಿ ಗೋಚರಿಸುವುದಿಲ್ಲ, ಕೆಲವು ಸೆಕೆಂಡುಗಳು ಮಾತ್ರ ಅವನು ಬೂತ್‌ನ ಕಡೆಗೆ ತಲೆ ತಿರುಗಿಸುತ್ತಾನೆ ಎಂಬುದನ್ನು ಹೊರತುಪಡಿಸಿ, ಕಾರಿನಲ್ಲಿ ಹೆಚ್ಚು ಜನರಿದ್ದಾರೆಯೇ ಎಂಬುದು ದೃಶ್ಯಗಳಿಂದ ಸ್ಪಷ್ಟವಾಗಿಲ್ಲ.
ದರಿಯಾಗಂಜ್, ಕೆಂಪುಕೋಟೆ ಪ್ರದೇಶ, ಕಾಶ್ಮೀರಿ ಗೇಟ್ ಮತ್ತು ಸುನೇಹ್ರಿ ಮಸೀದಿ ಬಳಿ ಸಿಸಿಟಿವಿ ಕ್ಯಾಮೆರಾಗಳಲ್ಲಿ ಕಾರು ಪತ್ತೆಯಾಗಿದೆ ಎಂದು ದೆಹಲಿ ಪೊಲೀಸ್ ಮೂಲಗಳು ತಿಳಿಸಿವೆ.
ಫರಿದಾಬಾದ್‌ನಿಂದ ಹೊರಟ ವಾಹನವು ನಂತರ ಬಹದ್ದೂರ್‌ಗಢ, ದರ್ಯಗಂಜ್, ಸುನೆಹ್ರಿ ಮಸೀದಿ ಮತ್ತು ನಂತರ ಕೆಂಪು ಕೋಟೆಯ ಪಕ್ಕದಲ್ಲಿರುವ ಪಾರ್ಕಿಂಗ್ ಸ್ಥಳಕ್ಕೆ ಸ್ಥಳಾಂತರಗೊಂಡಿತು ಎಂದು ಮೂಲಗಳು ತಿಳಿಸಿವೆ.
ಸೋಮವಾರ ಮಧ್ಯಾಹ್ನ 3:19 ಕ್ಕೆ ಪ್ರವೇಶಿಸಿ ಸಂಜೆ 6:48 ಕ್ಕೆ ನಿರ್ಗಮಿಸುವಾಗ ವಾಹನವು ಅಲ್ಲಿನ ಪಾರ್ಕಿಂಗ್ ಸ್ಥಳದಲ್ಲಿ ಮೂರು ಗಂಟೆಗಳಿಗೂ ಹೆಚ್ಚು ಕಾಲ ಇತ್ತು ಎಂದು ಹೇಳಲಾಗಿದೆ.
ದೆಹಲಿಯಲ್ಲಿ ಸೋಮವಾರ ಸಂಜೆ ಕಾರು ಸ್ಪೋಟಗೊಂಡ ನಂತರ ಘಟನೆಯ ಸಂಪೂರ್ಣ ವಿವರ ಹೀಗಿದೆ.
ಚಲಿಸುತ್ತಿದ್ದ ಕಾರು ಸ್ಪೋಟ: ನಡುಗಿದ ಕಟ್ಟಡಗಳು
ಭೂಕಂಪನದ ಅನುಭವ-ಛಿದ್ರಗೊಂಡ ಮೃತ ದೇಹಗಳು
ಚಲಿಸುತ್ತಿದ್ದ ಕಾರು ಸ್ಪೋಟಗೊಂಡು ಕನಿಷ್ಟ 9 ಜನರು ಸಾವನ್ನಪ್ಪಿದ್ದು, 25 ಕ್ಕೂ ಹೆಚ್ಚು ಜನರು ಗಾಯಗೊಂಡ ಘಟನೆ ನವದೆಹಲಿಯ ಕೆಂಪುಕೋಟೆ ಇರುವ ಮೆಟ್ರೋ ರೈಲು ನಿಲ್ದಾಣ ಬಳಿ ಸೋಮವಾರ ಸಂಜೆ ನಡೆದಿದೆ.
ಪ್ರವಾಸಿಗರಿಂದ ಸದಾ ಗಿಜಿಗುಡುವ ಚಾಂದಿನಿ ಚೌಕ್‌ ಪ್ರದೇಶದ ಟ್ರಾಫಿಕ್‌ ಸಿಗ್ನಲ್‌ನಲ್ಲಿ ನಿಧಾನಗತಿಯಲ್ಲಿ ಚಲಿಸುತ್ತಿದ್ದ ಕಾರು ಸ್ಪೋಟಗೊಂಡಿದೆ.
ಸ್ಪೋಟದ ತೀವ್ರತೆಗೆ ಸುತ್ತಮುತ್ತ ಇದ್ದ ಐದರಿಂದ ಆರು ಕಾರುಗಳು ಹಾಗೂ ಬೈಕ್‌ಗಳು ಸುಟ್ಟು ಕರಕಲಾಗಿವೆ. ಒಟ್ಟಾರೇ ಶಾಂತವಾಗಿದ್ದ ನವದೆಹಲಿಯಲ್ಲಿ ಈ ಘಟನೆ ಆತಂಕದ ವಾತಾವರಣವನ್ನು ಸೃಷ್ಟಿ ಮಾಡಿದೆ.
ಮೂಲಗಳ ಪ್ರಕಾರ ಸೋಮವಾರ ಸಂಜೆ 6.52 ಕ್ಕೆ ಕೆಂಪುಕೋಟೆ ಹತ್ತಿರದ ಮೆಟ್ರೋ ರೈಲು ನಿಲ್ದಾಣ ಬಳಿಯ ಟ್ರಾಫಿಕ್‌ ಸಿಗ್ನಲ್‌ನಲ್ಲಿ ನಿಧಾನವಾಗಿ ಚಲಿಸುತ್ತಿದ್ದ I-20 ಕಾರೊಂದು ಹಠಾತ ಸ್ಪೋಟಗೊಂಡಿದೆ.
ಆರಂಭದಲ್ಲಿ ಏನಾಯಿತು ಎಂದು ಅಂದುಕೊಳ್ಳುವಷ್ಟರಲ್ಲಿ ಸ್ಪೋಟದಿಂದ ಹೊತ್ತಿದ ಬೆಂಕಿಯ ಜ್ವಾಲೆ ಸುತ್ತಲೂ ಹರಡಿದೆ. ಕಾರಿನಲ್ಲಿದ್ದ ಹಾಗೂ ಕಾರಿನ ಸಮೀಪದಲ್ಲಿದ್ದ 9 ಜನರು ಸ್ಪೋಟದಲ್ಲಿ ಸಾವನ್ನಪ್ಪಿದ್ದಾರೆ.
ಕ್ಷಣಾರ್ಧದಲ್ಲಿ ಮೃತದೇಹಗಳು ಛಿದ್ರಗೊಂಡು ರಸ್ತೆಯಲ್ಲಿ ಚೆಲ್ಲಾಪಿಲ್ಲಿಯಾಗಿ ಬಿದ್ದ ದೃಶ್ಯ ಕಂಡು ಬಂದಿದೆ. ಬೆಂಕಿಯ ಜ್ವಾಲೆ ಸುತ್ತಮುತ್ತಲೂ ನಿಂತಿದ್ದ ಕಾರುಗಳಿಗೆ ಹಾಗೂ ಬೈಕ್‌ಗಳಿಗೆ ಹರಡಿ, ಅವುಗಳು ಕರಕಲಾಗಿವೆ.
ಸ್ಥಳದಲ್ಲಿ ದಟ್ಟ ಹೊಗೆ ಮತ್ತು ಭಾರಿ ಬೆಂಕಿಯ ಜ್ವಾಲೆ ಎದ್ದ ಪರಿಣಾಮ ಆತಂಕದಿಂದ ಜನರು ಭಯಭೀತರಾಗಿ ಓಡಿದ್ದಾರೆ.
ಕೆಲವೇ ನಿಮಿಷಗಳಲ್ಲಿ ಬಂದ ಅಗ್ನಿಶಾಮಕದಳ
30 ನಿಮಿಷ ಕಾರ್ಯಾಚರಣೆ-ನಿಯಂತ್ರಣಕ್ಕೆ ಬಂದ ಬೆಂಕಿ
ಸ್ಪೋಟಗೊಂಡ ಕಾರಿನಲ್ಲಿದ್ದ ಮೂವರ ಸಾವು-ಚಾಲಕನ ಬಂಧನ
ಚಲಿಸುತ್ತಿದ್ದ ಕಾರು ಸ್ಪೋಟಗೊಂಡು ಕೆಲವೇ ನಿಮಿಷಗಳಲ್ಲಿ ಅಗ್ನಿಶಾಮಕದಳ ಆಗಮಿಸಿದ್ದರಿಂದ ಹೆಚ್ಚಿನ ಅನಾಹುತ ತಪ್ಪಿದೆ. ಕೇವಲ ಅರ್ಧ ಗಂಟೆಯಲ್ಲಿ ಘಟನೆ ನಡೆದ ಸುತ್ತಮುತ್ತಲು ಆವರಿಸಿದ್ದ ಬೆಂಕಿಯನ್ನು ನಿಯಂತ್ರಣಕ್ಕೆ ತರಲಾಗಿದೆ.
ಬಳಿಕ ಇಡಿ ಪ್ರದೇಶವನ್ನು ತನಿಖಾ ತಂಡಗಳು ತಮ್ಮ ಸ್ವಾಧೀನಕ್ಕೆ ತೆಗೆದುಕೊಂಡರು. ವಿಧಿವಿಜ್ಞಾನ, ದೆಹಲಿ ಪೊಲೀಸ್ ವಿಶೇಷ ಘಟಕ, ಎನ್‌ಐಎ, ಎನ್‌ಎಸ್‌ಜಿ ತಂಡಗಳು ಉನ್ನತ ಮಟ್ಟದ ತನಿಖೆಯನ್ನು ಆರಂಭಿಸಿದವು.
ಈ ಮಧ್ಯೆ ಸ್ಪೋಟಗೊಂಡ ಕಾರಿನಲ್ಲಿದ್ದ (HR 26 CE 7674 ಸಂಖ್ಯೆಯ ಹುಂಡೈ I-20) ಮೂವರು ಘಟನೆಯಲ್ಲಿ ಸಾವನ್ನಪ್ಪಿರುವುದು ಬೆಳಕಿಗೆ ಬಂದಿದೆ.
ಕಾರಿನ ಡಿಕ್ಕಿಯಲ್ಲಿ ಸ್ಪೋಟಕ ವಸ್ತುಗಳನ್ನು ಇಟ್ಟಿದ್ದರು ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ.
ಈ ಮಧ್ಯೆ ತ್ವರಿತಗತಿಯಲ್ಲಿ ತನಿಖೆ ನಡೆಸಿದ್ದರ ಪರಿಣಾಮ ಕಾರಿನ ಮಾಲೀಕ ಸಲ್ಮಾನ್ ಎಂಬಾತನ್ನು ವಶಕ್ಕೆ ಪಡೆಯಲಾಗಿದೆ ಎಂದು ತಿಳಿದು ಬಂದಿದೆ.
ದೆಹಲಿ ಸ್ಪೋಟದಲ್ಲಿ ಬಳಸಿದ ಕಾರು ಪುಲ್ವಾಮಾದ ವೈದ್ಯ
ಕಾರಿನ ಹಾಲಿ ಮಾಲೀಕ ಉಮರ್ ಮೊಹಮ್ಮದ್ ನಾಪತ್ತೆ
ಸೋಮವಾರದಂದು ಕೆಂಪು ಕೋಟೆ ಮೆಟ್ರೋ ನಿಲ್ದಾಣದ ಸ್ಫೋಟಕ್ಕೆ ಬಳಸಲಾದ ಬಿಳಿ ಹುಂಡೈ ಐ20 ಕಾರು ಪುಲ್ವಾಮಾ ಮೂಲದ ವೈದ್ಯ ಉಮರ್ ಮೊಹಮ್ಮದ್ಗೆ ಸೇರಿದ್ದು ಎಂದು ಗೊತ್ತಾಗಿದೆ.
ಕಾರಿನ ಪ್ರಸ್ತುತ ಮಾಲೀಕನನ್ನು ಪುಲ್ವಾಮಾದ ವೈದ್ಯ ಉಮರ್ ಮೊಹಮ್ಮದ್ ಎಂದು ಗುರುತಿಸಲಾಗಿದ್ದು, ಫರಿದಾಬಾದ್‌ನಲ್ಲಿ ಸೋಮವಾರದ ದಾಳಿಗೆ ಮುನ್ನ ಬಂಧಿಸಲಾದ ಇಬ್ಬರು ವೈದ್ಯರಂತೆಯೇ ಈತನೂ ಭಯೋತ್ಪಾದಕ ಜಾಲಕ್ಕೆ ಸೇರಿದವನೆಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ತನಿಖಾಧಿಕಾರಿಗಳು ಕಾರಿನ ಮಾಲೀಕತ್ವದ ಹಾದಿಯನ್ನು ಬೆನ್ನೆತ್ತಿ ಹೊರಟಾಗ ಮೂಲಗಳು ತಿಳಿಸುವಂತೆ ಅದರ ಮೂಲ ಮಾಲೀಕ ಸಲ್ಮಾನ್ ಆಗಿದ್ದು ನಂತರ ಆತ ದೇವೆಂದರ್‌ಗೆ ಮಾರಾಟ ಮಾಡಿದ್ದಾನೆ. ಬಳಿಕ ಆತ ಈಗ ಚಿತ್ರದಲ್ಲಿರುವ ಉಮರ್ ವಾಹನವನ್ನು ಖರೀದಿಸಿದ್ದು ಪತ್ತೆಯಾಗಿದೆ.
2900 ಕೆಜಿ ಸ್ಪೋಟಕಗಳು ಪತ್ತೆ! ನವದೆಹಲಿಯಲ್ಲಿ ಹೈ ಅಲರ್ಟ್
ಸ್ಪೋಟ ಘಟನೆಯ ನಂತರ ಹಾಗೂ ಅದಕ್ಕೂ ಮುನ್ನ 2900 ಕೆಜಿ ಸ್ಪೋಟಕಗಳು ಪತ್ತೆಯಾದ ಹಿನ್ನೆಲೆಯಲ್ಲಿ ನವದೆಹಲಿಯಾದ್ಯಂತ ಹಾಗೂ ರಾಜಧಾನಿಗೆ ಕಲ್ಪಿಸುವ ಗಡಿಗಳಲ್ಲಿ ಭಾರೀ ಪೊಲೀಸ್ ಭದ್ರತೆಯನ್ನು ಹೆಚ್ಚಿಸಲಾಗಿದೆ.
ಪ್ರತಿಯೊಂದು ವಾಹನಗಳ ತಪಾಸಣೆ ಮಾಡಲಾಗುತ್ತಿದೆ. ಮೆಟ್ರೋ ನಿಲ್ದಾಣಗಳು ಹಾಗು ರೈಲು ನಿಲ್ದಾಣಗಳಲ್ಲಿಯು ಸಹ ಪೊಲೀಸ್ ಭದ್ರತೆ ನಿಯೋಜಿಸಲಾಗಿದೆ.
ಸ್ಪೋಟ ನಡೆದ ಸ್ಥಳಕ್ಕೆ ಬಂದ ಗೃಹ ಸಚಿವ
ಪ್ರಧಾನಿ ಮೋದಿಗೆ ಮಾಹಿತಿ ನೀಡಿದ ಅಮಿತ್‌ ಶಾ
ಕೇಂದ್ರ ಗೃಹ ಸಚಿವ ಅಮಿತ್‌ ಶಾ, ಕಾರು ಸ್ಪೋಟದ ಕುರಿತು ಕೇಂದ್ರ ಗೃಹ ಕಾರ್ಯದರ್ಶಿ, ಗುಪ್ತಚರ ಇಲಾಖೆಯ ನಿರ್ದೇಶಕರು ಮತ್ತು ದೆಹಲಿ ಪೊಲೀಸ್ ಆಯುಕ್ತರೊಂದಿಗೆ ಸಭೆ ನಡೆಸಿ, ಮಾಹಿತಿ ಸಂಗ್ರಹಿಸಿದರು.
ನಂತರ ಘಟನೆಯ ಎಲ್ಲ ವಿಷಯಗಳನ್ನು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಗೃಹ ಸಚಿವ ಅಮಿತ್‌ ಶಾ ವಿವರ ನೀಡಿದರು.
ಬಳೀಕ ಸ್ಪೋಟಗೊಂಡ ಸ್ಥಳಕ್ಕೆ ಖುದ್ದು ಭೇಟಿ ನೀಡಿ, ಪರಿಶೀಲನೆ ನಡೆಸಿದರು. ನಂತರ ಈ ಬಗ್ಗೆ ಮಾತನಾಡಿರುವ ಅಮಿತ್‌ ಶಾ, ಘಟನೆ ನಡೆದ ಹತ್ತು ನಿಮಿಷಗಳಲ್ಲಿಯೇ ದೆಹಲಿ ಪೊಲೀಸರು ಸ್ಥಳಕ್ಕೆ ಆಗಮಿಸಿದ್ದಾರೆ.
ಎಫ್‌ಎಸ್‌ಎಲ್‌ , ಎನ್‌ಎಸ್‌ಜಿ ಯೋಧರು, ಎನ್‌ಐಎ ಅಧಿಕಾರಿಗಳೂ ಸ್ಥಳಕ್ಕೆ ತೆರಳಿ ತನಿಖೆ ಆರಂಭಿಸಿದ್ದಾರೆ. ಸ್ಪೋಟದ ತನಿಖೆಯನ್ನು ಎಲ್ಲ ಆಯಾಮಗಳಲ್ಲಿ ನಡೆಸಲಾಗುವುದು ಎಂದು ತಿಳಿಸಿದ್ದಾರೆ.
2900 ಕೆಜಿ ಸ್ಪೋಟಕ ವಸ್ತುಗಳು ವಶ
ಉಗ್ರ ವೈದ್ಯರನ್ನು ಬಂಧಿಸಿದ ಪೊಲೀಸರು
ದೆಹಲಿ ಸ್ಪೋಟಕ್ಕೂ ಮುನ್ನ ಹರಿಯಾಣದ ಫರೀದಾಬಾದ್‌ನಲ್ಲಿ 2900 ಕೆಜಿ ಸ್ಫೋಟಕಗಳು ಹಾಗು ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ಜಮ್ಮು ಕಾಶ್ಮೀರ ಪೊಲೀಸರು ನಡೆಸಿದ ನಡೆಸಿದ ಮಹತ್ವದ ಕಾರ್ಯಾಚರಣೆ ನಡೆಸಿ ವಶಕ್ಕೆ ಪಡೆದಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ, ಮೂವರು ವೈದ್ಯರು ಸೇರಿ ಎಂಟು ಶಂಕಿತ ಉಗ್ರರನ್ನು ಬಂಧಿಸಿದ್ದಾರೆ. ಫರೀದಾಬಾದ್‌ನಲ್ಲಿ ವಾಸವಿದ್ದ ಡಾ.ಮುಜಮ್ಮಿಲ್‌ ಗನೈನ್‌ ಮನೆಯಲ್ಲಿ ಭಾರೀ ಸ್ಪೋಟಕ ಇರುವದರ ಬಗ್ಗೆ ಖಚಿತ ಮಾಹಿತಿ ಪಡೆದುಕೊಂಡೆ ದಾಳಿ ನಡೆಸಿದ್ದ ಪೊಲೀಸರಿಗೆ 2900 ಕೆಜಿ ಸ್ಪೋಟಕ ವಸ್ತುಗಳು ಸಿಕ್ಕಿವೆ.
ಇದರಲ್ಲಿ 360 ಕೆಜಿ ದಹನಶೀಲ ವಸ್ತು, ಅಮೋನಿಯಂ ನೈಟ್ರೆಟ್‌, ಪೊಟ್ಯಾಸಿಯಮ್‌ ನೈಟ್ರೆಟ್‌ ಮತ್ತು ಸಲ್ಫರ ಸೇರಿದಂತೆ 20 ಟೈಮರ್‌ಗಳೂ, 2 ಕೆಜಿ ಭಾರದ ಲೋಹ, ವಾಕಿಟಾಕಿ ಸೆಟ್‌ಗಳು ಹಾಗೂ ಒಂದು ಅಸಾಲ್ಟ್‌ ರೈಫಲ್‌ ವಶಕ್ಕೆ ಪಡೆಯಲಾಗಿದೆ.
ಇದಲ್ಲದೆ ಚೀನಾ ನಿರ್ಮಿತ ಸ್ಟಾಟ್‌ ಪಿಸ್ತೂಲ್‌, ಬೆರೆಟ್ಟಾ ಪಿಸ್ತೂಲ್‌, ಮದ್ದುಗುಂಡುಗಳು, ಎಕೆ 56 ರೈಫಲ್‌, ಟೈಮರ್‌ಗಳು ಸೇರಿದಂತೆ ಇನ್ನು ಹಲವು ಸ್ಪೋಟಕ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ.
ಪಾಕ್‌ ಜೊತೆ ಉಗ್ರರ ನಂಟು-ಐಸಿಸ್‌ ಜೊತೆ ಸಂಬಂಧ
ವೈದ್ಯೆ ಬಳಿ ಎಕೆ 47!ಶೈಕ್ಷಣಿಕ ಉದ್ದೇಶಕ್ಕೆ ನಿಧಿ ಸಂಗ್ರಹ
ಬಂಧಿತ ಉಗ್ರರಲ್ಲಿ ವೈದ್ಯೆಯೊಬ್ಬಳ ಬಳಿ ಎಕೆ 47 ರೈಫೆಲ್‌ ಪತ್ತೆಯಾಗಿದೆ. ಈ ರೈಫೆಲ್‌ ಅನ್ನು ಅವಳು ತನ್ನ ಕಾರಿನಲ್ಲಿ ಇಟ್ಟಿದ್ದಳು ಎನ್ನಲಾಗಿದೆ. ಬಂಧಿಯ ವೈದ್ಯೆಯನ್ನು ಶಾಹಿನ್‌ ಎಂದು ಹೇಳಲಾಗಿದೆ.
ಇನ್ನು ಈ ಎಲ್ಲ ಉಗ್ರರು ತಮ್ಮ ಕಾನೂನುಬಾಹಿರ ಚಟುವಟಿಕೆಗಳಿಗೆ ಶೈಕ್ಷಣಿಕ ಜಾಲಗಳ ಮೂಲಕ ಹಣ ಸಂಗ್ರಹಿಸುತ್ತಿರುವದು ಬೆಳಕಿಗೆ ಬಂದಿದೆ. ಈ ಹಣವನ್ನು ವಿಧ್ವಂಸಕ ಕೃತ್ಯಕ್ಕೆ ಬೇಕಾಗುವ ಸಲಕರಣೆಗಳನ್ನು ಖರೀಧಿಸಲು ಬಳಸುತ್ತಿದ್ದರು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ಕಾರು ಸ್ಪೋಟ, ಸಾವು ನೋವು
-ಪ್ರಧಾನಿ ಮೋದಿ, ಖರ್ಗೆ ಸಂತಾಪ
ಕಾರು ಸ್ಫೋಟದಲ್ಲಿ ತಮ್ಮ ಪ್ರೀತಿ ಪಾತ್ರರನ್ನು ಕಳೆದುಕೊಂಡವರಿಗೆ ಪ್ರಧಾನಿ ನರೇಂದ್ರ ಮೋದಿ ಸಂತಾಪ ಸೂಚಿಸಿದ್ದಾರೆ. ಗಾಯಾಳುಗಳು ಶೀಘ್ರ ಚೇತರಿಸಿಕೊಳ್ಳಲಿ ಎಂದು ಹೇಳಿದ್ದಾರೆ.
ಗೃಹ ಸಚಿವ ಅಮಿತ್‌ ಶಾ ಅವರು ಘಟನೆಯ ಪರಿಸ್ಥಿತಿಯನ್ನು ಪರಿಶೀಲಿಸಲಿದ್ದಾರೆ ಎಂದು ತಿಳಿಸಿದ್ದಾರೆ.
ಇದೇ ವೇಳೆ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ್‌ ಖರ್ಗೆ ಅವರು ಸ್ಪೋಟದಲ್ಲಿ ನಿಧನರಾದವರ ಸುದ್ದಿ ಕೇಳಿ ತುಂಬಾ ದುಃಖವಾಯಿತು. ಲೋಪಕ್ಕೆ ಕಾರಣರಾದವರ ಮೇಲೆ ಸರ್ಕಾರ ಕಠಿಣ ಕ್ರಮಕೈಗೊಳ್ಳಬೇಕೆಂದು ಎಂದು ಹೇಳಿದ್ದಾರೆ.
ವಿಜಯೀಂದ್ರ ಹುನಗುಂದ್‌
ಪ್ರಧಾನ ಸಂಪಾದಕ
ನ್ಯೂಇಂಡಿಯಾ ಕನ್ನಡ
ಬೆಂಗಳೂರು
