ಅನ್ನದಾತರು ಸಂಕಷ್ಟದಲ್ಲಿದ್ದರೇ, ಸಿದ್ದರಾಮಯ್ಯಗೆ ಅಧಿಕಾರದ ಚಿಂತೆ! ರೈತರ ಕಡೆಗಣನೆ ಖಂಡಿಸಿ, ರಾಜ್ಯಾದ್ಯಂತ ಪ್ರತಿಭಟನೆ-ಬಿ ಸಿ ಪಾಟೀಲ್‌ ಎಚ್ಚರಿಕೆ

ರೈತರ ಹಿತ ಮರೆತು, ಸಮಸ್ಯೆಗಳನ್ನ ಕಡೆಗಣಿಸಿ ಅಧಿಕಾರ ಹಂಚಿಕೆ ಜಗಳದಲ್ಲೇ ಮುಳುಗಿರುವ ಸಿದ್ದರಾಮಯ್ಯ ನೇತೃತ್ವದ ಕಾಂಗ್ರೆಸ್ ಸರ್ಕಾರದ ವಿರುದ್ದ ರಾಜ್ಯಾದ್ಯಂತ ಪ್ರತಿಭಟನೆ ನಡೆಸುವುದಾಗಿ ಮಾಜಿ ಕೃಷಿ ಸಚಿವ ಬಿಸಿ ಪಾಟೀಲ್ ಹೇಳಿದ್ದಾರೆ.

ಮಂಗಳವಾರದಂದು ಶಿವಮೊಗ್ಗದಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ರಾಜ್ಯ ಸರ್ಕಾರ ನೀಡುತ್ತಿರುವ ಬೆಳೆಹಾನಿ ಪರಿಹಾರ ಹಿಂದಿನ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ನೀಡಿದ್ದಕ್ಕಿಂತ ಕಡಿಮೆ ಇದೆ.

ಒಂದು ಗುಂಟೆಗೆ 40 ರೂಪಾಯಿ ಪರಿಹಾರ ನೀಡಿದರೆ ಅದನ್ನ ಭಿಕ್ಷುಕರೂ ಕೂಡ ನಿರಾಕರಿಸುತ್ತಾರೆ ಎಂದು ಟೀಕಿಸಿದರು.

ಮೆಕ್ಕೆ ಜೋಳ ಬೆಳೆಯುವ ರೈತರು ಸಂಕಷ್ಟದಲ್ಲಿದ್ದಾರೆ. ರಾಜ್ಯ ಸರ್ಕಾರ ಇನ್ನೂ ಖರೀದಿ ಕೇಂದ್ರಗಳನ್ನೇ ತೆರೆದಿಲ್ಲ. ಭತ್ತದ ಬೆಳೆ ಹಾನಿಗೊಳಗಾಗಿದೆ ಎಂದು ಬಿ ಸಿ ಪಾಟೀಲ್ ಹೇಳಿದರು.

ಪರಿಹಾರ ಘೋಷಿಸಿ ತಿಂಗಳು ಕಳೆದರೂ ಪರಿಹಾರವನ್ನೇ ನೀಡಿಲ್ಲ, ಬದಲಾಗಿ ರಾಜ್ಯದ ಎಲ್ಲ ಸಮಸ್ಯೆಗಳಿಗೂ ಕೇಂದ್ರ ಸರ್ಕಾರದತ್ತ ಬೊಟ್ಟು ಮಾಡುವುದನ್ನ ರೂಡಿಸಿಕೊಂಡಿದ್ದು ರೈತರ ಹಿತ ಕಾಯುವಲ್ಲಿ ರಾಜ್ಯ ಸರ್ಕಾರ ಸಂಪೂರ್ಣ ವಿಫಲವಾಗಿದೆ ಎಂದು ಮಾಜಿ ಸಚಿವ ಬಿ ಸಿ ಪಾಟೀಲ್ ಹರಿಹಾಯ್ದರು.

ಕಬ್ಬು ಬೆಳೆಗಾರಿಗೆ ಪ್ರತಿ ಟನ್ ಕಬ್ಬಿಗೆ ನಿಗದಿಪಡಿಸಿರುವ 3300 ರೂಪಾಯಿ ದರವನ್ನು ಎಲ್ಲಾ ಜಿಲ್ಲೆಗಳ ರೈತರಿಗೂ ಅನ್ವಯವಾಗಬೇಕು.

ಯಡಿಯೂರಪ್ಪ ಸರ್ಕಾರದ ಅವಧಿಯಲ್ಲಿ ಮುಖ್ಯಮಂತ್ರಿ ಕಿಸಾನ್ ಸಮ್ಮಾನ್ ಯೋಜನೆಯಡಿ ರೈತರಿಗೆ ವರ್ಷಕ್ಕೆ 4ಸಾವಿರ ನೀಡಲಾಗುತ್ತಿತ್ತು. ಈಗಿನ ಕಾಂಗ್ರೆಸ್ ಸರ್ಕಾರ ನಿಲ್ಲಿಸಿದೆ. ಅದೇ ರೀತಿ ರೈತರಿಗೆ ವಿದ್ಯುತ್ ಟ್ರಾನ್ಸಫಾರ್ಮರ್ ಹಾಗೂ ವಿದ್ಯುತ್ ಸಂಪರ್ಕವನ್ನ 25 ಸಾವಿರ ರೂಗಳಲ್ಲಿ ನೀಡುವ ಯೋಜನೆ ಕೂಡ ಸ್ಥಗಿತ ಗೊಳಿಸಿದೆ ಎಂದು ಮಾಜಿ ಸಚಿವ ಬಿ ಸಿ ಪಾಟೀಲ್ ಆಕ್ರೋಶ ವ್ಯಕ್ತಪಡಿಸಿದರು.

ಪ್ರಸ್ತುತ ರೈತರು ಟ್ರಾನ್ಪಾರ್ಮರ್ ಮತ್ತು ವಿದ್ಯುತ್ ಸಂಪರ್ಕಕ್ಕೆ ಎರಡೂವರೆ ಲಕ್ಷ ಪಾವತಿಸಬೇಕಾಗಿದ್ದು ಅತ್ಯಂತ ದುಬಾರಿಯಾಗಿದೆ.

ಕಿಸಾನ್ ಸಮ್ಮಾನ್, ಮತ್ತು 25 ಸಾವಿರಕ್ಕೆ ವಿದ್ಯುತ್ ಟ್ರಾನ್ಸ್ ಫಾರ್ಮರ್ ಅಳವಡಿಕೆ ಸೌಲಭ್ಯ ಪುನಃ ನೀಡುವಂತೆ ಎಂದು ಬಿ ಸಿ ಪಾಟೀಲ್ ಆಗ್ರಹಿಸಿದರು.

ಸಿದ್ದರಾಮಯ್ಯ ಸರ್ಕಾರ ಹಲವು ಗ್ಯಾರಂಟಿಗಳನ್ನ ನೀಡಿದ್ದು ಅದರಲ್ಲಿ ರೈತರ ಆತ್ಮಹತ್ಯೆ 6 ನೇ ಗ್ಯಾರಂಟಿಯಾಗಿದೆ ಎಂದು ವ್ಯಂಗವಾಡಿದರು.

ಗೃಹ ಲಕ್ಮೀ , ಶಕ್ತಿ ಯೋಜನೆ ಹೆಸರಲ್ಲಿ ಜನರಿಗೆ ವಂಚಿಸಲಾಗುತ್ತಿದೆ. ಬಸ್ ಪ್ರಯಾಣ ದರ ದುಪ್ಪಟ್ಟಾಗಿದೆ. ಗೃಹಲಕ್ಮ್ಮೀ ಮೂವತ್ತು ತಿಂಗಳಿಗೆ 60 ಸಾವಿರ ಹಣ ಬರಬೇಕಿತ್ತು ಆದರೆ ಮೂವತ್ತು ಸಾವಿರ ಅಷ್ಟೇ ನೀಡಿದ್ದಾರೆ.

ವಿದ್ಯಾನಿಧಿ ಮಾನದಂಡವೇ ದುಸ್ತರವಾಗಿದೆ. ಫಲಾನುಭವಿಗಳಿಗೆ ದೊರಕುವುದೇ ಕಷ್ಟ ಇನ್ನೂ ಬಡವರ ಬಿಪಿಎಲ್ ಕಾರ್ಡ್ ಅವೈಜ್ಞಾನಿಕವಾಗಿ ರದ್ದುಪಡಿಸುವುದನ್ನ ಬಿಸಿ ಪಾಟೀಲ್ ಖಂಡಿಸಿದರು.

ಗ್ಯಾರಂಟಿ ಹೆಸರಿನಲ್ಲಿ ನೇರವಾಗಿ ಸರ್ಕಾರ ಜನರ ಜೇಬಿಗೆ ಕತ್ತರಿಹಾಕ್ತಾ ಇದೆ ಎಂದು ದೂರಿದರು.

ಮಾಜಿ ಶಾಸಕ ಡಿ ಎನ್‌ ಜೀವರಾಜ್‌, ಬಿಜೆಪಿ ಜಿಲ್ಲಾಧ್ಯಕ್ಷ ಜಗದೀಶ್, ರೈತ ಮೋರ್ಚಾದ ಗಣೇಶ್ ಬಿಳಕಿ, ಮುಖಂಡರಾದ ಶಿವರಾಜ್, ಹರೀಶ್, ನಾಗರಾಜ್ ಸಂಚಾಲಕ ಮಂಜುನಾಥ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.

ವರದಿ: ಸೌಮ್ಯ ರೆಡ್ಡಿ
ಬ್ಯುರೋ ಚೀಫ್‌
ನ್ಯೂ ಇಂಡಿಯಾ ಕನ್ನಡ
ಶಿವಮೊಗ್ಗ.