Shivamogga: ದುಷ್ಕರ್ಮಿಗಳಿಂದ ಯುವಕನ ಮೇಲೆ ಹಲ್ಲೆ-ಬಡಾವಣೆಗಳಲ್ಲಿ ಭಯದ ವಾತಾವರಣ| ದೂರುದಾರರಿಗೆ ರಕ್ಷಣೆ ನೀಡದ ಪೊಲೀಸ್‌ರ ವಿರುದ್ದ ಶಾಸಕ ಚೆನ್ನಬಸಪ್ಪ ಗರಂ..

ಶಿವಮೊಗ್ಗ ನಗರದ ಹಲವೆಡೆ ಕ್ಷುಲ್ಲಕ ಕಾರಣಕ್ಕೆ ನಡೆಯುತ್ತಿರುವ ಹಲ್ಲೆ, ದರೋಡೆ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಸೋಮವಾರದಂದು ಖುದ್ದು ಶಾಸಕ ಎಸ್‌ ಎನ್‌ ಚೆನ್ನಬಸಪ್ಪ ಅವರು ದೊಡ್ಡಪೇಟೆ ಪೊಲೀಸ್‌ ಠಾಣೆಗೆ ತೆರಳಿ ಕ್ರಮಕ್ಕೆ ಆಗ್ರಹಿಸಿದ ಘಟನೆ ನಡೆದಿದೆ.

ಶನಿವಾರ ಸಂಜೆ ಆರ್‌ಎಂಎಲ್‌ ನಗರದಲ್ಲಿ ಹರೀಶ್‌ ಎಂಬುವವರನ್ನು ಅಡ್ಡಗಟ್ಟಿ ಹಲ್ಲೆ ಮಾಡಲಾಗಿತ್ತು. ಅಲ್ಲದೇ ಅವರ ಬಳಿ ಇದ್ದ 22 ಸಾವಿರ ರೂ ಹಣವನ್ನು ಸಹ ದೋಚಿದ್ದರು ಎಂದು ಹೇಳಲಾಗಿದೆ.

ಘಟನೆಯಲ್ಲಿ ಗಾಯಗೊಂಡ ಹರೀಶ್‌ ಅವರನ್ನು ಮೆಗ್ಗಾನ್‌ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿತ್ತು. ಈ ಬಗ್ಗೆ ದೂರು ನೀಡಿದರೂ ಪೊಲೀಸರು ಪಡೆಯದೇ ಇರುವುರಿಂದ ಶಾಸಕ ಎಸ್‌ ಎನ್‌ ಚೆನ್ನಬಸಪ್ಪ, ಸೋಮವಾರದಂದು ಸಾರ್ವಜನಿಕರ ಸಮೇತ ದೊಡ್ಡಪೇಟೆ ಪೊಲೀಸ್‌ ಠಾಣೆಗೆ ಆಗಮಿಸಿ, ಪೊಲೀಸರನ್ನು ತರಾಟೆಗೆ ತೆಗೆದುಕೊಂಡ ಘಟನೆ ನಡೆದಿದೆ.

ಪೊಲೀಸ್‌ ಠಾಣೆಗೆ ಬರಲು ಹೆದರಿದ್ದ ವ್ಯಕ್ತಿ-
ಶಾಸಕರ ಸಮಕ್ಷಮದಲ್ಲಿ ದೂರು ದಾಖಲಿಸಿದ ಹರೀಶ್‌

ಶನಿವಾರದಂದು ದುಷ್ಕರ್ಮಿಗಳಿಂದ ಹಲ್ಲೆಗೊಳಗಾಗಿ ಗಂಭೀರವಾಗಿ ಗಾಯಗೊಂಡಿದ್ದ ಹರೀಶ್‌ ಅವರು ನೀಡಿದ ದೂರನ್ನು ಪೊಲೀಸರು ಪಡೆದಿರಲಿಲ್ಲ ಎನ್ನಲಾಗಿದೆ.

ಈ ಹಿನ್ನಲೆಯಲ್ಲಿ ಗಂಭೀರ ಗಾಯಗೊಂಡಿದ್ದ ಹರೀಶ್‌ ಅವರನ್ನು ಶಾಸಕ ಚೆನ್ನಬಸಪ್ಪ ಅವರು ತಮ್ಮ ಜೊತೆ ದೊಡ್ಡಪೇಟೆ ಪೊಲೀಸ್‌ ಠಾಣೆಗೆ ಕರೆದುಕೊಂಡು ಬಂದು ದೂರು ದಾಖಲಿಸಲು ನೆರವಾದರು.

ಹಲ್ಲೆ ಮಾಡಿದ ವ್ಯಕ್ತಿಗಳು ಅಟ್ಟಾಡಿಸಿ ಹೊಡೆದಿದ್ದಾರೆ ಎಂದು ಭಯದಿಂದಲೇ ಹರೀಶ್‌ ಪೊಲೀಸರ ಮುಂದೆ ಹೇಳಿದರು ಎನ್ನಲಾಗಿದೆ.

ಸಿವಿಲ್‌ ಕೇಸಗಳಲ್ಲಿ ಪೊಲೀಸರು ಭಾಗಿ-
ದೂರು ಕೊಟ್ಟವರ ಮನೆಗೆ ನುಗ್ಗಿ ಹಲ್ಲೆ-
ಶಾಸಕ ಚನ್ನಬಸಪ್ಪ ಆರೋಪ

ಸಾರ್ವಜನಿಕರನ್ನು ಹಾಡಹಗಲೇ ಬೆದರಿಸಿ, ಹಲ್ಲೆ ನಡೆಸಿ, ಹಣ ದೋಚುತ್ತಿರುವ ದುಷ್ಕರ್ಮಿಗಳ ಬೆಂಬಲಕ್ಕೆ ಸ್ವತಃ ಪೊಲೀಸರು ನಿಂತಿರುವದರಿಂದ ಪೊಲೀಸ್‌ ಠಾಣೆಗೆ ಬರಲು ಅಮಾಯಕರು ಹೆದರುವಂತಾಗಿದೆ ಎಂದು ಶಾಸಕ ಚೆನ್ನಬಸಪ್ಪ ಆರೋಪಿಸಿದ್ದಾರೆ.

ದುಷ್ಕರ್ಮಿಗಳಿಂದ ಭಾದ್ಯಸ್ಥರಾದ ಜನರು ದೂರು ನೀಡಲು ಹೋದರೇ, ಕ್ಷಣಾರ್ಧದಲ್ಲಿ ದೂರು ಕೊಟ್ಟವರ ಜಾತಕವು ದುಷ್ಕರ್ಮಿಗಳ ಕೈ ಸೇರುತ್ತಿದೆ.

ಹೀಗಾಗಿ ಜನರು ಪೊಲೀಸ್‌ ಠಾಣೆಗೆ ಬಂದು ದೂರು ನೀಡಲು ಹೆದರುತ್ತಿದ್ದಾರೆ ಇದನ್ನು ತಾವು ಸಹಿಸುವದಿಲ್ಲ ಈ ಕುರಿತು ಹೋರಾಟ ಮಾಡಬೇಕಾದಿತು ಎಂದು ಎಚ್ಚರಿಸಿದರು.

ಶಿವಮೊಗ್ಗದಲ್ಲಿ ಹಾಡಹಗಲೇ ಗೂಂಡಾಗಿರಿ-
ಸಂಜೆಯಾದರೆ ಕೆಲ ಬಡಾವಣೆಗಳಲ್ಲಿ ಭಯದ ವಾತಾವರಣ-
ಗೃಹ ಸಚಿವರಿಗೆ ದೂರು ನೀಡಿರುವ ಶಾಸಕ ಚೆನ್ನಬಸಪ್ಪ

ನಗರದಲ್ಲಿ ಗಾಂಜಾ, ಇಸ್ಪೀಟ್‌ ಹಾವಳಿ ಮೀತಿ ಮೀರಿದೆ. ಇದೆಲ್ಲ ಪೊಲೀಸರ ಬೆಂಬಲವಿಲ್ಲದೆ ಇಷ್ಟು ರಾಜಾರೋಷವಾಗಿ ನಡೆಯಲು ಸಾಧ್ಯವಿಲ್ಲ ಎಂದು ಆರೋಪಿಸಿದರು.

ಸಂಜೆಯಾದ ಬಳಿಕ ಆರ್‌ಎಂಎಲ್‌, ಮಾನವರ್ಮಿ ಬೈಲ್‌, ಹೊಸಮನೆ ಸೇರಿದಂತೆ ಹಲವು ಬಡಾವಣೆಗಳಲ್ಲಿ ಜನರು ಮನೆಯಿಂದ ಹೊರಬರಲು ಹೆದರುತ್ತಿದ್ದಾರೆ. ಈ ಬಗ್ಗೆ ಜನರು ತಮ್ಮ ಬಳಿ ಬಂದು ಅಳಲು ತೋಡಿಕೊಳ್ಳುತ್ತಿದ್ದಾರೆ.

ಜನರಿಗೆ ರಕ್ಷಣೆ ಕೊಡಲಾಗದ ಪೊಲೀಸರ ವರ್ತನೆ ಬಗ್ಗೆ ಶಾಸಕ ಚೆನ್ನಬಸಪ್ಪ ಆಕ್ರೋಶ ಹೊರಹಾಕಿದರು.

ನಗರದಲ್ಲಿ ಜನತೆಗೆ ರಕ್ಷಣೆ ಕೊಡಬೇಕಾದ ಪೊಲೀಸರು, ದುಷ್ಕರ್ಮಿಗಳ ಬೆಂಬಲಕ್ಕೆ ನಿಂತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಭಯಭೀತ ಬಡಾವಣೆಗಳಿಗೆ ತೆರಳಿ,
ಧೈರ್ಯ ತುಂಬಿದ ಶಾಸಕ ಚೆನ್ನಬಸಪ್ಪ

ಇನ್ನು ಇದೇ ವೇಳೆ ದುಷ್ಕರ್ಮಿಗಳ ಹಾವಳಿಯಿಂದ ಭಯಭೀತರಾದ ಕೆಲ ಬಡಾವಣೆಗಳಿಗೆ ಸೋಮವಾರದಂದು ಖುದ್ದು ಶಾಸಕ ಚೆನ್ನಬಸಪ್ಪ ತೆರಳಿ ಜನರಲ್ಲಿ ಧೈರ್ಯ ತುಂಬುವ ಕೆಲಸ ಮಾಡಿದರು.

ಮನೆ ಮನೆಗಳಿಗೆ ತೆರಳಿದ ಶಾಸಕರು, ಗೂಂಡಾಗಳ ನಿಗ್ರಹವನ್ನು ತಡೆಗೆಟ್ಟುವ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳಲಾಗುವದು ಎಂದು ಭರವಸೆ ನೀಡಿದರು.

ಅಂಗಡಿ ಮುಂಗಟ್ಟುಗಳಿಗೆ ಭೇಟಿ ನೀಡಿದ ಶಾಸಕ ಚೆನ್ನಬಸಪ್ಪ, ಯಾರೇ ತೊಂದರೆ ಕೊಟ್ಟರೂ ದೂರು ನೀಡಿ, ನಿಮ್ಮ ಬೆಂಬಲಕ್ಕೆ ನಾನೀದ್ದೇನೆ ಎಂದು ಅಭಯ ನೀಡಿದರು.

ನಗರದಲ್ಲಿ ನಡೆಯುತ್ತಿರುವ ಎಲ್ಲ ಘಟನೆಗಳ ಬಗ್ಗೆ ಗೃಹ ಸಚಿವ ಡಾ.ಪರಮೇಶ್ವರ್‌ ಅವರಿಗೆ ದೂರು ನೀಡಿದ್ದೇನೆ ಎಂದು ಇದೇ ವೇಳೆ ಶಾಸಕ ಚೆನ್ನಬಸಪ್ಪ ಹೇಳಿದರು.

ಒಟ್ಟಾರೇ, ಇವತ್ತು ಖುದ್ದು ಶಾಸಕರೇ ಸಾರ್ವಜನಿಕರ ಪರ ದೂರು ನೀಡಲು ಪೊಲೀಸ್‌ ಠಾಣೆಗೆ ಬಂದಿದ್ದು ನೋಡಿದರೇ, ಶಿವಮೊಗ್ಗದಲ್ಲಿ ಎಲ್ಲವೂ ಸರಿಯಿಲ್ಲ ಎಂಬುದಂತು ಈಗ ಖಾತ್ರಿಯಾಗಿದೆ.

ದಾವಣಗೆರೆ ವಲಯದ ಐಜಿಪಿ, ಖಡಕ ಪೊಲೀಸ್‌ ಅಧಿಕಾರಿ ರವಿಕಾಂತೇಗೌಡ ಅವರು ಒಮ್ಮೆ ಇಲ್ಲಿ ಬಂದರೇ ಒಳಿತು ಎಂಬ ಭಾವನೆ ಇಲ್ಲಿನ ಅಮಾಯಕ ಜನರಾದ್ದಾಗಿದೆ.

ವರದಿ: ಸೌಮ್ಯ ರೆಡ್ಡಿ
ಬ್ಯುರೋ ಚೀಫ್‌
ನ್ಯೂಇಂಡಿಯಾ ಕನ್ನಡ
ಶಿವಮೊಗ್ಗ