ಶಿವಮೊಗ್ಗ ನಗರದಲ್ಲಿ ಹದೆಗೆಟ್ಟ ಕಾನೂನು ಸುವ್ಯವಸ್ಥೆ| ಗೃಹ ಸಚಿವರ ಮೊರೆ ಹೋದ ಶಾಸಕ ಚೆನ್ನಬಸಪ್ಪ|ಪುಂಡರ ನಿಗ್ರಹಕ್ಕೆ ಬರಲಿದ್ದಾರೆ ಐಜಿಪಿ ರವಿಕಾಂತೇಗೌಡ..

ಶಿವಮೊಗ್ಗ ಮಹಾನಗರದಲ್ಲಿ ಕಾನೂನು ಮತ್ತು ಸುವ್ಯವಸ್ಥೆಯ ಪರಿಸ್ಥಿತಿ ಗಂಭೀರವಾಗಿ ಹದೆಗೆಟ್ಟಿದೆ ಎಂದು ಆರೋಪಿಸಿರುವ ಶಾಸಕ ಎಸ್‌ ಎನ್‌ ಚೆನ್ನಬಸಪ್ಪ, ಬುಧವಾರದಂದು ಬೆಂಗಳೂರಿನಲ್ಲಿ ಗೃಹ ಸಚಿವ ಡಾ. ಜಿ ಪರಮೇಶ್ವರ್, ಪೊಲೀಸ್ ಮಹಾನಿರ್ದೇಶಕ ಡಾ. ಎಂ.ಎ. ಸಲೀಮ್ ಹಾಗೂ ಅಪರ ಪೊಲೀಸ್ ಮಹಾ ನಿರ್ದೇಶಕ ಹಿತೇಂದ್ರ ಕುಮಾರ್ ಅವರನ್ನು ಭೇಟಿಯಾಗಿ ದೂರು ಸಲ್ಲಿಸಿದ್ದಾರೆ.

ಜಿಲ್ಲಾ ಪೊಲೀಸ್ ಇಲಾಖೆಯ ಅಧಿಕಾರಿಗಳ ಬೇಜವಾಬ್ದಾರಿ ಹಾಗೂ ಕರ್ತವ್ಯ ಲೋಪದ ಬಗ್ಗೆ ಶಿಸ್ತು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿ ಅವರು ಮನವಿ ಸಲ್ಲಿಸಿದರು.

ಪುಂಡರ ಹಾವಳಿ ತಡೆಯಲು ಪೊಲೀಸರ ನಿರ್ಲಕ್ಷ
ಮನವಿ ಕೊಟ್ಟ ಶಾಸಕ ಚೆನ್ನಬಸಪ್ಪ

ಪುಂಡರ ಹಾವಳಿಯಿಂದ ಗಂಭೀರ ಗಾಯಗೊಂಡಿದ್ದ ಹರೀಶ್‌ ಅಂದು ದೂರು ಕೊಡಲು ಹೋದರೂ, ಪೊಲೀಸರು ಕ್ರಮ ಕೈಗೊಳ್ಳದೇ ಇದ್ದಿದ್ದರಿಂದ ಆಕ್ರೋಶಗೊಂಡಿದ್ದ ಶಾಸಕ ಚೆನ್ನಬಸಪ್ಪ, ಗಾಯಾಳು ಹರೀಶ್‌ ಅವರ ಮನೆಗೆ ಹೋಗಿ ಅವರನ್ನು ತಮ್ಮ ಜೊತೆ ದೊಡ್ಡಪೇಟೆ ಠಾಣೆಗೆ ಕರೆದುಕೊಂಡು ಬಂದಾಗಲೇ ಪೊಲೀಸರು ದೂರು ಸ್ವೀಕರಿಸಿದ್ದರು.

ಸಂಜೆಯಾದರೇ ಸಾಕು, ಕೆಲ ಬಡಾವಣೆಗಳಲ್ಲಿ ಮನೆಯಿಂದ ಹೊರಬರದ ವಾತಾವರಣವಿರುವ ಪ್ರದೇಶಗಳಿಗೆ ತೆರಳಿ ಜನರಲ್ಲಿ ಧೈರ್ಯ ತುಂಬಿದ್ದರು.

ಆದರೆ ಯಾರದೋ ಒತ್ತಡಕ್ಕೆ ಮಣಿದಂತಿರುವ ಕೆಲ ಪೊಲೀಸ್‌ ಅಧಿಕಾರಿಗಳಿಂದ ನ್ಯಾಯ ಸಿಗಲ್ಲ ಎಂದು ಮನಗಂಡಿದ್ದ ಶಾಸಕ ಚೆನ್ನಬಸಪ್ಪ, ಬುಧವಾರದಂದು ನೇರವಾಗಿ ಗೃಹ ಸಚಿವರು, ಡಿಜಿ ಐಜಿಪಿ ಹಾಗು ಎಡಿಜಿಪಿ ಅವರನ್ನು ಭೇಟಿಯಾಗಿ ಪುಂಡರ ಹಾವಳಿ ಬಗ್ಗೆ ದಾಖಲೆ ಸಮೇತ ದೂರು ನೀಡಿದರು.

ಜಿಲ್ಲೆಯ ಕೆಲ ಪೊಲೀಸ್‌ ಅಧಿಕಾರಿಗಳ ಬೇಜವಾಬ್ದಾರಿ ನಿರ್ಲಕ್ಷ ವರ್ತನೆಯಿಂದ ಆಗುತ್ತಿರುವ ಅನಾಹುತಗಳ ಬಗ್ಗೆ ಖುದ್ದು ವಿವರಣೆ ನೀಡಿದರು.

ಕಳೆದ ಎರಡು ವರ್ಷಗಳಿಂದ ನಗರದಲ್ಲಿ ನಾಗರಿಕರ ಮೇಲೆ ನಡೆಯುತ್ತಿರುವ ನಿರಂತರ ಹಲ್ಲೆಗಳು, ಮಾದಕ ವಸ್ತುಗಳ ಮಿತಿಮೀರಿದ ಬಳಕೆ ಮತ್ತು ಅಪರಾಧ ಕೃತ್ಯಗಳ ವಿಪರೀತ ಹೆಚ್ಚಳಕ್ಕೆ ಸಂಬಂಧಿಸಿದಂತೆ ವಿಸ್ತೃತವಾಗಿ ಚರ್ಚೆ ನಡೆಸಿದರು.

ಇತ್ತೀಚೆಗೆ ನಗರದ ನಿವಾಸಿ ಹರೀಶ್ ಎಂಬುವರ ಮೇಲೆ ಪುಂಡರು ನಡೆಸಿರುವ ಹಲ್ಲೆ ಪ್ರಕರಣದ ಕುರಿತು ವಿಶೇಷವಾಗಿ ಈ ಸಂದರ್ಭದಲ್ಲಿ ಗಮನ ಸೆಳೆದರು.

ಶಿವಮೊಗ್ಗ ಕೆಲ ಬಡಾವಣೆಗಳಲ್ಲಿ ಭಯದ ವಾತಾವರಣ
ಬೇಜವಾಬ್ದಾರಿ ಪೊಲೀಸ್‌ ಅಧಿಕಾರಿಗಳ ಮೇಲೆ ಕ್ರಮಕ್ಕೆ ಆಗ್ರಹ
ಗೃಹ ಸಚಿವ ಪರಮೇಶ್ವರ ಅವರಿಂದ ಶೀಘ್ರ ಸ್ಪಂದನೆ-ಚೆನ್ನಬಸಪ್ಪ

ಶಿವಮೊಗ್ಗದಲ್ಲಿ ಪುಂಡರ ಹಾವಳಿ ಬಗ್ಗೆ ಹಾಗು ಪೊಲೀಸರ ಬೇಜವಾಬ್ದಾರಿತನದಿಂದ ಆಗುತ್ತಿರುವ ಅನಾಹುತಗಳ ಬಗ್ಗೆ ನಾವು ನೀಡಿದ ಮಾಹಿತಿಯನ್ನು ಆಲಿಸಿದ ಗೃಹ ಸಚಿವ ಡಾ. ಜಿ ಪರಮೇಶ್ವರ್, ಡಿಜಿ,ಐಜಿಪಿ ಡಾ. ಎಂ.ಎ. ಸಲೀಮ್ ಹಾಗೂ ಎಡಿಜಿಪಿ ಹಿತೇಂದ್ರ ಕುಮಾರ್ ತಕ್ಷಣವೇ ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ ಎಂದು ಶಾಸಕ ಚೆನ್ನಬಸಪ್ಪ ತಿಳಿಸಿದ್ದಾರೆ.

ಕೆಲ ಬಡಾವಣೆಗಳಲ್ಲಿ ಸಂಜೆಯಾದರೇ ಜನರು ಹೊರಬರದ ಪರಿಸ್ಥಿತಿ ಇದೆ ಎಂಬುದನ್ನು ಗೃಹ ಸಚಿವರಿಗೆ ಮನವರಿಕೆ ಮಾಡಿಕೊಡಲಾಯಿತು.

ಆಗ ಎಲ್ಲವನ್ನು ಆಲಿಸಿದ ಗೃಹ ಸಚಿವ ಡಾ.ಜಿ.ಪರಮೇಶ್ವರ ಅವರು, ಶಿವಮೊಗ್ಗದ ಸುರಕ್ಷತೆ ಮತ್ತು ಸಾರ್ವಜನಿಕ ಶಾಂತಿಯ ವಿಷಯದಲ್ಲಿ ಯಾವುದೇ ರಾಜಿ ಇಲ್ಲ ಎಂದು ಭರವಸೆ ನೀಡಿದ ಅವರು, ತಕ್ಷಣವೇ ಕ್ರಮ ಕೈಗೊಳ್ಳಬೇಕೆಂದು ಹಿರಿಯ ಪೊಲೀಸ್‌ ಅಧಿಕಾರಿಗಳಿಗೆ ಖಡಕ ಸೂಚನೆ ನೀಡಿದರು ಎಂದು ಶಾಸಕ ಚೆನ್ನಬಸಪ್ಪ ಹೇಳಿದರು.

ಗುರುವಾರದಂದು ಶಿವಮೊಗ್ಗಕ್ಕೆ ಐಜಿಪಿ ರವಿಕಾಂತೇಗೌಡರು
ಖಡಕ ಪೊಲೀಸ್‌ ಅಧಿಕಾರಿ ಆಗಮನಕ್ಕೆ ಪುಂಡರಲ್ಲಿ ನಡುಕ..

ಗೃಹ ಸಚಿವ ಡಾ.ಜಿ ಪರಮೇಶ್ವರ ಅವರು ಹಿರಿಯ ಅಧಿಕಾರಿಗಳಿಗೆ ಖಡಕ ಆದೇಶ ನೀಡಿದ ಬೆನ್ನಲ್ಲೆ, ಗುರುವಾರದಂದು ಶಿವಮೊಗ್ಗಕ್ಕೆ ದಾವಣಗೆರೆ ಪೂರ್ವ ವಲಯ ಐ.ಜಿ.ಪಿ ರವಿಕಾಂತೇಗೌಡ ಆಗಮಿಸಲಿದ್ದಾರೆ.

ಜಿಲ್ಲೆಯ ಕಾನೂನು ಸುವ್ಯವಸ್ಥೆಯ ವಾಸ್ತವ ಪರಿಸ್ಥಿತಿ ಮತ್ತು ಪೊಲೀಸ್ ಅಧಿಕಾರಿಗಳ ಕಾರ್ಯಕ್ಷಮತೆಯನ್ನು ಸಮಗ್ರವಾಗಿ ಪರಿಶೀಲಿಸಲಿದ್ದಾರೆ ಎಂದು ಎನ್ನಲಾಗಿದೆ.

ಜಿಲ್ಲೆಯ ಪೊಲೀಸ್‌ ವರಿಷ್ಠಾಧಿಕಾರಿ ಮಿಥುನ್‌ ಕುಮಾರ್‌ ಅವರು ಸೇರಿದಂತೆ ಡಿಎಸ್‌ಪಿ ಬಾಬು ಆಂಜನಪ್ಪ, ದೊಡ್ಡಪೇಟೆ ಠಾಣೆ ಇನ್ಸ್‌ಪೆಕ್ಟರ್‌ ರವಿ ಪಾಟೀಲ್‌ ಅವರ ಮೇಲೆ ಶಾಸಕ ಚೆನ್ನಬಸಪ್ಪ ಆರೋಪ ಮಾಡಿರುವದರಿಂದ ದಾವಣಗೆರೆ ಪೂರ್ವ ವಲಯ ಐ.ಜಿ.ಪಿ ರವಿಕಾಂತೇಗೌಡ ಅವರು, ಅವಶ್ಯಕ ತಿದ್ದುಪಡಿ ಕ್ರಮಗಳನ್ನು ಕೈಗೊಳ್ಳಲಿದ್ದಾರೆ ಎಂದು ತಿಳಿದು ಬಂದಿದೆ.

ದಾವಣಗೆರೆ ಪೂರ್ವ ವಲಯ ಐ.ಜಿ.ಪಿ ರವಿಕಾಂತೇಗೌಡ ಅವರ ಗುರುವಾರದ ಭೇಟಿ, ಜಿಲ್ಲಾ ಪೊಲೀಸ್ ಇಲಾಖೆಯಲ್ಲಿ ಹೊಣೆಗಾರಿಕೆ ಮತ್ತು ಶಿಸ್ತನ್ನು ಮರುಸ್ಥಾಪಿಸುವ ವಿಶ್ವಾಸವಿದೆ ಎಂದು ಇದೇ ವೇಳೆ ಶಾಸಕ ಚೆನ್ನಬಸಪ್ಪ ಹೇಳಿದ್ದಾರೆ.

ಒಟ್ಟಾರೇ, ಶಿವಮೊಗ್ಗದಲ್ಲಿ ನಡೆಯುತ್ತಿರುವ ಪುಂಡರ ಹಾವಳಿ ಹಾಗೂ ಪೊಲೀಸರ ನಿರ್ಲಕ್ಷದ ವಿರುದ್ದ ಸ್ವತಃ ಶಾಸಕ ಚೆನ್ನಬಸಪ್ಪನವರೇ ಪೊಲೀಸ್‌ ಠಾಣೆಗೆ ದೂರು ಕೊಡಿಸಲು ಹೋಗಬೇಕಾದಂತಹ ಪರಿಸ್ಥಿತಿ ಬಂದಾಗಲೇ “ನ್ಯೂ ಇಂಡಿಯಾ ಕನ್ನಡ” ಡಿಜಿಟಲ್‌ ಪತ್ರಿಕೆಯು ಇದನ್ನು ಸರಿಪಡಿಸಲು ಖಡಕ ಪೊಲೀಸ್‌ ಅಧಿಕಾರಿ ರವಿಕಾಂತೇಗೌಡರೇ ಸೂಕ್ತ ಎಂದು ಹೇಳಿತ್ತು.

ರವಿಕಾಂತೇಗೌಡರು ದಾವಣಗೆರೆ ಪೂರ್ವ ವಲಯದ ಐಜಿಪಿ ಆಗಿರುವದರಿಂದ ಅವರ ವ್ಯಾಪ್ತಿಯಲ್ಲಿ ಬರುವ ಶಿವಮೊಗ್ಗಕ್ಕೆ ಬಂದರೇ ಸಮಸ್ಯೆ ಬಗೆಹರಿಯಲಿದೆ ಎಂದು ಪ್ರಕಟಿಸಿತ್ತು.

ಯಾಕೆಂದರೇ, ಒಂದು ಕಾಲದಲ್ಲಿ ಹುಬ್ಬಳ್ಳಿಯಲ್ಲಿನ ನಕಲಿ ಸಾರಾಯಿ ದಂಧೆಯನ್ನು ಬೇರು ಸಮೇತ ಕಿತ್ತು ಎಸೆದಿದ್ದ ರವಿಕಾಂತೇಗೌಡರು, ಆಗ ಅದೇಷ್ಟೋ ದುಷ್ಕರ್ಮಿಗಳನ್ನು ಸಹ ಮಟ್ಟ ಹಾಕುವಲ್ಲಿ ಯಶಸ್ವಿಯಾಗಿದ್ದರು.

ಹೀಗಾಗಿ ಹುಬ್ಬಳ್ಳಿ ಕರಾಳ ದಂಧೆಯನ್ನು ಹಾಗು ಅಲ್ಲಿಯ ಪುಂಡರನ್ನು ಸದೆಬಡೆದಿದ್ದ ರವಿಕಾಂತೇಗೌಡರಿಗೆ ಶಿವಮೊಗ್ಗದ ಪುಂಡರನ್ನು ತಹಬಂದಿಗೆ ತರಲು ಕಷ್ಟವಾಗಲಿಕ್ಕಿಲ್ಲ ಎಂಬುದು “ನ್ಯೂಇಂಡಿಯಾ ಕನ್ನಡ” ಡಿಜಿಟಲ್‌ ಪತ್ರಿಕೆಯ ವಿಶ್ವಾಸ..

ವಿಶೇಷ ವರದಿ: ಸೌಮ್ಯ ರೆಡ್ಡಿ
ಬ್ಯುರೋ ಚೀಫ್‌
ನ್ಯೂ ಇಂಡಿಯಾ ಕನ್ನಡ
ಶಿವಮೊಗ್ಗ